Saga félagsins

Skotíþróttafélag Hafnarfjarðar var stofnað 11. október 1965 af nokkrum áhugasömum mönnum um skotfimi.

Heiti félagsins var í upphafi Skotfélagið í Hafnarfirði en var síðar breytt í Skotíþróttafélag Hafnarfjarðar til að leggja áherslu á og leiðrétta þann útbreidda misskilning að félagið væri veiðifélag en ekki íþróttafélag.

Skotíþróttafélagið hefur frá stofnun verið innan íþróttahreyfingarinnar með aðild sinni að Íþróttabandalagi Hafnarfjarðar og eingöngu æft og keppt í ólympískum skotgreinum.

Fyrstu árin

Í upphafi var mikil gróska í starfsemi félagsins og var aðallega æft og keppt í markskotfimi með 22 cal markrifflum.

Á sama tíma var mikil gróska í Skotfélagi Reykjavíkur og mikið um keppnir á milli félaganna og eru margar skemmtilegar sögur til um slíka atburði frá gamla rómaða herbragganum í Hálogalandi.

Aðstaða til æfinga var ekki góð fyrstu árin og nær eingöngu æft inni og m.a. bílaverkstæði notað til æfinga.

Síðar var flutt í kjallarann á íþróttahúsinu við Strandgötu þar sem aðstaða var fremur léleg. Starfsemin dalaði að sama skapi og var ekki mikið líf í félaginu fram til ársins 1988.

Haglabyssuskotfimi

Árið 1988 var með hvatningu frá Skotsambandi Íslands ráðist í að reisa völl undir haglabyssuskotfimi en slík skotfimi hafði ekki verið stunduð áður hjá félaginu.

Á þeim tíma stóð Skotsamband Íslands að sérstöku átaki fyrir útbreiðslu á haglabyssuíþróttinni Skeet og er óhætt að fullyrða í dag að sú skotíþrótt sé sú útbreiddasta enda skeetvelli að finna um allt land.

Óbrynnishólar

Völlur félagsins var reistur í Óbrynnishólum við Bláfjallaveg ofan við Hafnarfjörð. Aðstaðan var í gömlum malarnámum og aðeins ætluð til bráðabirgða. Umhverfið var frekar óhrjálegt og ekki þótti verjandi að eyða tíma né peningum í fegrun þess.

Enda kom á daginn að staðsetningin hentaði ekki til langframa, bæði vegna námuvinnslu sem enn var stunduð þar og eins vegna hljóðmengunar frá svæðinu sem í raun var staðsett í miðri náttúruparadís þar sem fólk vildi njóta útivistar utan skarkala þéttbýlisins.

Leitin að nýju svæði

Árið 1997 var farið í leit að svæði þar sem starfsemin gæti fallið inn í skarkala, umferð og skylda starfsemi og félli því betur að umhverfi sínu.

Við leitina var haft í huga að þetta væri íþróttafélag sem hefði ákveðnum skyldum að gegna gagnvart félagsmönnum sínum og ekki síst gagnvart ungu fólki sem ætti erfitt með að ferðast langan veg til að komast á æfingar.

Með þessar forsendur að leiðarljósi var leitað að svæði í meiri nálægð við byggð og þar sem hávær starfsemi væri fyrir. Staðsetning í nálægð við iðnaðarhverfi, Reykjanesbraut og á milli tveggja akstursíþróttabrauta er því engin tilviljun — starfseminni var valin staður í Kaphelluhrauni rétt ofan við kvartmílubrautina.

Iðavellir

Meðan á uppbyggingu nýs vallar stóð var félagið án æfingaaðstöðu í tvö ár. Einstaka félagsmenn nýttu sér aðstöðu annarra skotíþróttafélaga og keppnislið félagsins hélt uppi merki og heiðri félagsins út á við og stóð sig framúrskarandi vel þrátt fyrir aðstöðuleysi.

Ný og glæsileg aðstaða var síðan tekin í notkun 5. júní 1999 með mikilli opnunarhátíð þar sem bæjarstjórinn í Hafnarfirði opnaði völlinn með því að klippa í borða í íslensku fánalitunum.

Aðstaðan er öll hin vandaðasta og mikil áhersla hefur verið lögð á vinalegt umhverfi — búið er að sá, planta og tyrfa fyrir miklar upphæðir og með mikillu vinnu.

Svæðið sem fengið hefur nafnið Iðavellir er eitt hið glæsilegasta á landinu og er óhætt að fullyrða að félagsmönnum líður vel á svæði félagsins.